Топ-100 Kimdir günahkar

Kimdir günahkar


162 saylı məktəbin müəllimindən açıqlama...


 Qaranlıq otağın qara pişiyi kimdir?..
Uzun zaman idi, Azərbaycanla bağlı heç nə yazmırdım. Ona görə yox ki, daha mənə maraqlı deyil, sadəcə, qaranlıq otaqdakı qara pişiyin qara rəngi bəhanə edilərək, hər şey görməzdən gəlinir. Onun dəhşət saçan gözləri isə heç kəsin vecinə deyil...
İlk öncə onu qeyd edim ki, bir il əvvəl mən də E.Əliyev adına 162 saylı məktəbin müəllimi idim. Başqa ölkəyə getməyimlə əlaqədar olaraq, işdən çıxmaq məcburiyyəti qarşısında qaldım...
Bu günlərdə həmin məktəbin şagirdi Elinanın özünü üçüncü mərtəbədən atması, məni daha çox sarsdı. Çünki bu və buna bənzər hadisələrin baş verməsi qaçınılmaz idi. Başqa sözlə, faciə haray sala-sala gəlirdi. Amma nə Elinaların, nə də baş verən naqisliklərə qarşı mübarizə aparanların səsini kimsə dinləmədi. Olanlar isə olur...  
Bu hadisədə məni daha çox sarsan, indi hamının E.Əliyev adına 162 saylı məktəbin direktoru haqqında ən acı sözləri deməsidir. Sanki ətrafda baş verənlərdən heç kimin xəbəri yox imiş kimi...
Gəlin, səmimi olaq... Gəlin, həqiqətin gözünə baxmağa çalışaq, vicdanımızın səsinə qulaq asaq və belə bir suala cavab verək, axı bu hadisədə kimdir günahkar?..Təkcə Sevinc Abbasovamı, yoxsa?..
Əzizlərim, əslində, Elinanın ölümündə suçlular çoxdur..
İlk öncə Təhsil Nazirliyidir...
Belə ki, zamanında bu direktordan çox şikayətlər olub. Amma həmin təhsil nazirliyindən, onun alt qurumu olan Bakı Təhsil İdarəsindən yoxlama adı altında gələnlər, baş verən qanunsuzluqları aşkar edib tədbir görmək əvəzinə, əksinə, cinayət tərkibli nöqsanların üstünü ört-basdır etməklə məşğul oldular...
Həmin direktorun azğınlaşmasında Səbail rayon İcra hakimiyyəti də günahkardır.
Bilənlər bilir, bu məktəb bir il bundan əvvəl güya kapital təmir olunmuşdu. Hətta Prezident İlham Əliyev də təmirdən sonra məktəbi ziyarət etmişdi. Amma məktəb, təxminən iki-üç həftə sonra uçub dağılmağa başladı. Hələ o zaman “ Altı təzək, üstü bəzək” adlı bir məqalə də yazmışdım. Məktəbin nə qədər keyfiyyətsiz təmir olunduğunu işıqlandırmağa çalışmışdım. Amma həmin İcra hakimiyyəti məktəb rəhbərliyindən mənə basqı göstərməyi istədi. Nəticədə mənim davranışımın güya dövlətçiliklə uyuşmadığını söyləyərək, fərqli formada təzyiqlərə başladılar. Sanki rüşvət almaq, qanunsuz yeyintiyə yol vermək, dövlətçiliyin təməl prinsiplərindənmiş kimi.
O zaman dediyim bu oldu, bu minvalla, bir çox faciənin səbəbkarı olacaqsınız... Amma nafilə! Hətta həmin İcra başçısının vəzifəsi artırıldı və o, Bakı Şəhər İcra Hakimiyyətinin başçısı təyin olundu.
Hər belə qanun pozuntusu və haqsızlıqlardan Təhsil Nazirliyinin, Bakı Şəhər Təhsil İdarəsinin və Rayon İcra Hakimiyyətlərinin dəstəyi ilə qalib çıxan Sevinc Abbasovalar “Bağdadda kor xəlifə, burda mən” ədası ilə daha betər hoqqabazlıqlardan çıxmağa başladılar.
Bəs valideynlər necə?..
Haqsızlıqlara qarşı səsini çıxarmağa çalışan müəllimləri susdurmaq üçün şərə, böhtana , şantaja əl atan diretorun pis əməllərinə təəssüf ki, zaman-zaman valideynlər də həvəslə dəstək ola bildilər...
Bu gün valideyn övladının yüksək qiymətləndirilməsi üçün məktəbin müdriyyəti, sinif rəhbərləri və artıq sistemin bataqlığı içində boğulan müəllimləri ilə istənilən razılaşmaya gedə bilirlər... Nə yazıq ki, bu çirkab içində olanlar ümumi müəllim ordusunun adını rahatlıqla ləkələməyi bacarırlar...
Bəs hakimiyyət?..
Ən nəhatət, əgər bir həftə içində iki yaşlı insan, bir yeniyetmə qız yüksək mərtəbədən atlanmaqla, özünə qəsd edirsə, demək, toplum pis vəziyyətdədir. Başqa sözlə, sosial imkansızlıqlar içində çırpınan əhalinin səsinə səs verməyən hakimiyyət də düşünməlidir!!! Amma düşünürmü, və ya düşünəcəkmi? İnanmaq xeyli çətindir.
Haqsızlıqlar qarşısında çarəsiz qalaraq od vurub özünü yandıran Qarabağ qazisinin vaqesi kimi, bu hadisənin də bir müddət sonra unudulması heç kimə sirr deyil. Bir qədər sonra yenə də əl əli,əl də üzü yuyacaq!!!
İndi siz deyin, kimdir günahkar!!!
Məncə, haqq-ədaləti təbliğ edən, amma əməldə bunun tərsini öyrədən təhsil sistemindəki ziddiyyətdir və bu ziddiyyəti tətikləyən mühitdir...Məhz bu amillərdir, Sevinc Abbasova kimi laqeyd, bir o qədər də vicdansız kadrları yetişdirir.
Yenə də doğrusunu kütlə bilər...
Şahin Əliyev, E.Əliyev adına 162 saylı məktəbin sabiq müəllimi  

0/Şərhlər

Previous Post Next Post