Топ-100 Şahin Əliyev: İlham Əliyevi Putin xilas etdi

Şahin Əliyev: İlham Əliyevi Putin xilas etdi


Müsahibimizə görə FETO-nun təhlükəli yanı nələrdir?..

(əvvəli ötən, 28 aprel  və 06 may 2019-cu ilki yayınımızda)
Üçüncü hissə
M: Təhlükə demişkən, dünyada baş verən təlatümlər fonunda Azərbaycan hakimiyyətinin həyta keçirdiyi dövlət təhlükəsizliyi məsələsinə necə baxırsınız? Bir anlıq mənə elə gəldi ki, siz yuxarıda məhz buna işarə edirsiniz...
Ş.Ə: Azərbaycanın təhlükəsizliyi ilə bağlı sualları yanlış ünvana yönləndirirsiniz. Hətta ona mənim hər hansı münasibət bildirməyim belə, doğru deyil. Ən azı ona görə ki, hər hansı bilgim yoxdur.
M: Amma bir az əvvəl təhlükədən danışdınız.
Ş.Ə: Həmin təhlükədən istənilən qədər danışa bilərəm. Amma nə faydası var. Azərbaycanda ağla qara o qədər iç-içədir ki, buraya işıq tutmağın heç bir mənası yoxdur.
M: O zaman bildiklərinizi söyləyin, heç olmazsa, xalq ayıq-sayıq olsun.
Ş.Ə: Xalqın bildiyindən fərqli və ya çox heç nə bilmirəm. Əminəm ki, bir jurnalist kimi siz də mənim bildiklərimindən daha çox məsələlərdən xəbərdarsınız.
M: O zaman sualımın şəklini dəyişim. Hazırda FETO-nun Azərbaycanda təsir gücü nə qədərdir? Ümumiyyətlə, bu qruplaşma Azərbaycana necə ayaq aça bildi?
Ş.Ə: Türkiyə türkcəsində desək, çox “kurnaz” jurnalistsiniz (gülür). Yəni deyirsiniz, ipi ucundan çözək?
 FETO-nun Azərbaycana ayaq açmasının altyapısı hələ Dağlıq Qarabağ və onun ətrafında cərəyan edən  hadisələr zamanında hazırlanmışdır. Lakin onun Azərbaycanda zühuru 1990-cl ilin 20 yanvar hadisələri ilə bağlı olub.
Məsələni kökündən aydınlatmaq üçün burada bir haşiyəyə çıxaraq qeyd edim ki, SSRİ-nin dağılması əgər bir tərəfdən partiya və dövlət qurumlarında samballı mövqe tutan rus milliyətçilərinin fəaliyyəti ilə bağlı olubsa, o biri yandan da təməli silahsızlaşma ilə qoyulan Amerika planı ilə əlaqədar baş tutub.
M: Üzr istəyirəm, necə yəni, rus milliyətçiləri SSRİ-ni dağıtmaq istəyirdi?
Ş.Ə: Yox, yanlış anladınız. Hələ 1981-ci ildə, yəni Lev Volodarskinin zamanında Mərkəzi Statistika İdarəsi tərəfindən həm KP MK, həm də DTK-ya SSRİ-nin yenidən qurulmasını əsaslandıran bir sənəd təqdim olunmuşdu. Sənəddə müttəfiq respublikaların yaşamasında bütün yükün Rusiya Federasiyasının üzərinə düşdüyü və buna görə də Rusiyanın tərəqqisinə mənfi təsir etdiyi bildirilirdi. Nəticədə güclənən Qərb dəyərləri qarşısında Rusiyanın sürətlə öz rəqabət gücünü itirməsindən bəhs olunurdu.
Amma hesabatda Rusiya siyasi elitasını daha şox rahatsız edən digər sovet xalqları arasında rifah halına görə daha çox rusların geri qalması, artan işsizlik ordusunda yenə də rus gənclərinin əsas yer tutması faktı idi. Ona görə də SSRİ-ni yenidən qurmaq, rus gəncliyini milli dəyərlər üzərindən tərbiyələndirmək zərurəti ortaya çıxmışdı. Amma bu Rusiya ilə birgə digər müttəfiq respublikalarda da oyanışı tətiklədi. Rus milliyətçilərinin planından xəbərdar olan Amerika nəticədə öz planını işə saldı. Sovet xüsusi xidmət orqanları Amerikanın oyununu pozmağa çalışdı, “qısa müddətli münqişə ocaqları” yaratdı. Lakin bu da SSRİ-ni xils edə bilmədi. Amerika konfiliklərin idarəsində daha bacarıqlı çıxdı.
M: Qəribə və olduqca maraqlı faktdır. Qayıdaq FETO-ya.
Ş.Ə: Dediyim kimi Amerika oyuna hər tərəfli hazırlaşmışdı. SSRİ-nin “münaqişə ocaqları” taktiksına demokratik müqavimət oyunu ilə cavab verirdi. Təsəvvür edin ki, ölkənin şimalında (Rusiya-red.), on illər öncə baş vermiş Hopea faciəsi üzərindən, hətta rus xalqını belə bir-birinə qarşı qoydu.
 Azərbaycanda isə 20 yanvar qətliamı baş verdi. ABŞ Böyük bir coğrafiyaya malik Türk dünyası üzərinə fərqli təşkilatlar yaratmaqla açılırdı. Bunlardan biri də FETO idi.  Bax, o zaman Fəttulah Güləni ortaya çıxardılar. Gülən 20 yanvar hadisələrinə çox sərt reaksiya verdi. Elə “hönkürdü” ki, səsi bütün Azərbaycanda eşidildi. Bu ilk həmlə oldu.
M: Bəs sonra?
Ş.Ə: Sonra isə Azərbaycan gənclərinin FETO kanalları ilə Türkiyədə təhsilləndirilməsi və onların dövlət qurumlarında yerləşdirilməsi prosesi başladı. Elm, təhsil, mədəniyyət, idmandan tutmuş, siyasi qurumlara, hüquq-mühafizə orqanlarınadək hər bir sahədə kadrlaşdılar.
M: Bu söylədiyinizi Türkiyədə təhsil alan bütün gənclərə şamil etmək olarmı?
Ş.Ə: Təbii ki yox.
M: Beləliklə FETO Azərbaycanda tanındı.
Ş.Ə: Fətullah Güləni 1998-ci ildə Azərbycanda geniş ictimaiyyətə tanıdan Qulu Məhərrəmli oldu. O, hər nə qədər bunu özünün peşəkar fəaliyyəti ilə bağlasa da, əslində belə deyil. Güləni böyük bir işığa bənzədən Qulu Məhərrəmli 2014-cü ildən etibarən “nurçu”luqdan "imtina" etdi. Bu da təbii idi. Çünki həmin vaxt artıq Gülənlə Ərdoğan arasında qarşıdurma yaranmışdı.
Azərbaycanda FETO-nu ictimaiyyətə sevdirən isə şair Məmməd Aslan olub. Bəxtiyar Vahabzadənin  Fətullah Gülənə məktubu da, onun tanınıb sevilməsində az rol oynamadı. Daha sonra Əli Çərkəzoğulları, Cəmaləddin Həsənoğulları, Fazil Mustafalar, Fuad Hüseynzadələr, İlham Məmmədlilər, Rəşad Məcidlər və s. meydanda az at oynatmadılar.
 Amma bu təhsil və media ayağıdır. Bunun siyasi qanadı da var.
M: Əgər siyasi qanadı varsa, niyə Türkiyədəkinə bənzər çevrilişə cəhd etmədilər?
Ş.Ə: Kim deyir ki, etmədilər?
Elə həmin vaxtlar məşhur milyarderlər ittifaqı Azərbaycanda çevrilişə cəhd etmədi?

2016-cı ildə FETO-çularla milyarderlər ittifaqı arasında ciddi yaxınlaşma olmadımı?
Məsələn, Əli Çərkəzoğlunun “zaman. az” saytında müxalif cəbhənin təmsilçisi Rafiq Əliyevdən müsahibə götürməsi və həmin söhbətin “strateq.az”-da təkrar yayımlanması bu yaxınlaşmanın sadə bir örnəyi deyildimi? Sizcə, bütün bunlar təsadüf idimi? Təbii ki yox. 

Həmin dövrdə İlham Əliyevi Putin xilas etdi. Sadəcə, Putin cərəyan edən prosesin inkişaf istiqamətini bir kəşfiyyatçı kimi anlaya bildi, yan-yörəsindəkilərə inanmadı və Moskvada binə salmış İlham Əliyev əleyhdarı qüvvələri dəstəkləmədi.
İlham Əliyev özü də Rusiya telekanallarından birinə verdiyi müsahibədə bu barədə xatırlatma etmişdi.
Rus jurnalistin “Rusiya sizi satmaz”- ifadəsini “Putin bizi satmaz”- şəklində redaktə etdi. Çünki İlham Əliyev Kremldə Azərbaycan müxalifəti ilə sıx əlaqədə olan və onun hakimiyyətdən getməsi üçün ciddi səy göstərən qüvvələr olduğunu bilirdi.
M: Belə çıxır ki, FETO Moskva ilə də danışıqlara gedə bilir?
Ş.Ə: Elə çıxmır. Elədir ki, var. FETO-nu təhlükəli edən də elə budur. İqtidarda təmsil olunmaq, daha sonra qazanılmış hakimiyyəti qorumaq üçün nə lazımdırsa, edirlər.
Amma FETO-nu daha təhlükəli edən insan zəkası, psixikası ilə asanlıqla manipulyasiya edə bilmələridir. Həm də bunu qarşı tərəfi aşağılayacı tərzdə, aşındıraraq həyata keçirirlər. Ona görə də öz yalanlarını doğru, qarşı tərəfin doğrusunu isə topluma asanlıqla yalan kimi təqdim edə bilirlər.
Bu isə təhsillə məşğul olan bir “xidmət” qurumunun işi deyil. Bu xüsusi xidmət orqanlarına xas xüsusiyyətdir.
Konfliktologiyanı mükəmml bildiklərindən Türkiyədə olduğu kimi Azərbaycanda, Qırğızıstanda və s. asanlıqla toplumu qütbləşdirə bilirlər.
Azərbaycanda “yeraz”-yerli söhbəti, qazaxlarla qırğızlar arasında qaplaqurup mübahisəsi, yəni kimin monqol, kimin türk olması davası sıradan qarşıdurmalar deyil. İşin təhlükəli yanı isə bu prosesdə bilərəkdən və ya bilməyərək, ziyalıların- elm, təhsil, mədəniyyət, din xadimlərinin, hətta idmançıların iştirak etməsidir.
M: Söylədiklərinizdən bu gün FETO-nun Azərbaycanın ən ciddi problemi olduğunu anladım, elədirmi?
Davamı növbəti yayınımızda...

0/Şərhlər

Previous Post Next Post