Putini fakt qarşısında qoymağa və ona təzyiq göstərməyə çalışıb

Niyə sülhməramlılar onları tərksilah etmir?

Rusiya prezidenti Vladimir Putin yerli və beynəlxalq media üçün özünün ənənəvi illik mətbuat konfransında maraqlı fikirlər səsləndirdi.

Putin qeyd etdi ki, Dağlıq Qarabağ Azərbaycan ərazisidir, Qarabağın statusu dəyişməz olaraq qalmalıdır. Status məsələsinə gələcəkdə qərar verilməlidir. Üçtərəfli razılaşmaya əsasən düşmənçiliyin dayandırılması və tərəflərin olduqları yerdə qalması irəliyə doğru atılmış ciddi addımdır.

Lakin görünən budur ki, Rusiya dövlət başçısının da birmənalı qeyd etdiyi məsələlər həm Rusiya, həm Ermənistan mediasında fərqli şəkildə şərh olunur.

Çünki rus və erməni mediası mövcud vəziyyəti erməni silahlıları ilə Azərbaycan SQ arasındakı qarşıdurma zonası kimi qələmə verirlər.

Əgər Azərbaycan SQ-ın qarşısında erməni silahlıları varsa, niyə sülhməramlılar onları tərksilah etmir? Axı, ermənilərin silahsızlaşdırılması  onların birbaşa vəzifəsidir.

Təəssüf ki, sülhməramlılar ermənilərə ev tikməklə məşğuldur.

Putinin çıxışında diqqət çəkən başqa bir məqam isə Rusiya sülhməramlılarının öz vəzifəsini layiqincə yerinə yetirməsi və tərəflərin də razılığı ilə bölgəyə əlavə gücün göndərilməsi fikri idi. Bu məntiq bizi belə bir qənaətə gətirib çıxarır ki, əslində erməni təxribatları Kremlin əli ilə törədilib. Çox güman ki, Rusiyanın şahin qanadı bu cür təxribatlarla Putini fakt qarşısında qoymağa və ona təzyiq göstərməyə çalışıb.Nəticədə güc yetərsizliyini bəhanə edərək, bölgəyə əlavə qüvvənin yeridilməsinə nail olmaq istəyirlər.

Görəcik, Bakı bu oyuna gələcək, ya yox.

Əldə etdiyimiz başqa bir xəbərə görə isə Rusiya Ermənistan tərəfdən sərhəd bölgəsinə qoşun yeridir. Məqsəd Azərbaycanın BMT tərəfindən tanınmış ərazilərinin tam bərpasına mane olmaqdır. Bilindiyi kimi işğaldan sonra ermənilər sərhəd məntəqələrini qanunsuz şəkildə Azərbaycanın ərazisinin dərinliklərinə doğru çəkmişdilər. 

P.S. Əldə etdiyimiz son bilgiyə görə ordumuz bəhsi gedən ərazilərdə sərhədlərimizin bərpasını uğurla davam etdirirlər.