Ermənistan yenidən çalxalanır, səbəb nədir?

Ermənistanda baş verən prosesin mahiyyəti nədən ibarətdir?

Bir neçə gündür ki, Ermənistan yenidən çalxalanmağa başlayıb. Əhalinin Paşinyana qarşı etirazlarının növbəti dalğasına start verilib. Ermənistanın sabiq rəhbərlərinin sərt bəyanatları, işğaldan azad edilmiş ərazilərdən çıxan ermənilərin Ermənistan hökumətindən narazılığı, sanki gözəgörünməz dirijor çubuğu ilə idarə edilməkdədir. Məsələnin mahiyyətini anlamaq üçün ekspertimiz Şahin Əlioğlunun fikirlərini öyrəndik. Onun sözlərinə görə bir neçə gün əvvəl Paşinyanın yenə də diplomatik üslubla uyuşmayan bir neçə bəyanatı oldu. Hər nə qədər rəsmi Yerevan yalanlasa da, amma mətbuatda onun bu bəyanatlarında bir tərəfdən Co Bayden üzərindən Putinin aşağılandığı, digər yandan isə Navalnının lehinə birmənalı mövqe sərgilədiyi qeyd olunur. Ermənistan Baş Nazirinin bu davranışı, güman ki, Putini qəzəbləndirib və onun islaholunmazlığı qənaətini gücləndirib. Buna görə də yaxın dostu Robert Köçəryanın vasitəsi ilə bu ölkədə hakimiyyət dəyişikliyi planına yenidən start verib. Bu mənada, Köçəryanın siyasətə geri döndüyü açıqlamasına təsadüf kimi baxılmamalıdır.

Əslində hazırda Ermənistan uğrunda Qərb-Rusiya qarşıdurmasının növbəti fazası yaşanır,- Şahin Əlioğlu belə deyib.